虛假謀殺案（上）
我好憎我老公。
所有親人、朋友，都唔明白我點解憎佢，因為佢冇咩壞習慣，對我都算千依百順。
但令我最最最討厭嘅係，佢好懦弱，懦弱到唔似男人。
同街外人爭執，佢好似一隻縮頭烏龜咁，幾乎匿喺我背後；喺屋企就連隻老鼠都驚。
我鬧過佢㗎，佢咪唯唯諾諾，恨不得將個頭縮入褲襠。
我想同佢離婚，但所有親友都反對，佢哋覺得懦弱唔係問題，反而讚我老公善良、好脾氣。
我老公就點都唔肯離婚，我個仔更加同我講，如果我夾硬離婚，就同我斷絕母子關係。
我既唔想容忍呢個垃圾，又唔想幾十歲人搞到眾叛親離，好頭痛啊。
於是，我日日鬧我老公，希望佢都頂我唔住，同意離婚。
我愈鬧佢，佢就愈驚，依加佢聽到我腳步聲，恨不得縮埋喺間房度。
但就算係咁，佢都唔肯同我離婚，佢話佢好愛我，有咩缺點佢都會努力改。
我真係冇晒辦法。
有一次，我喺出面條走廊晾衫嗰陣，因為晾衫位問題，同住隔離屋嘅小花嘈起上嚟。
老公經過，居然衝埋嚟就向小花道歉，仲想拉番我入屋。
「成隻烏龜咁，你係咪男人嚟㗎？」我嬲到震，轉身就鬧到老公狗血淋頭。
老公唯唯諾諾咁入番屋，關埋門。
唉，此情此景，我都冇心情再同小花嘈。
我嘆氣：「我老公好廢丫可？」
「都係㗎，虧你對住佢咁多年。」小花笑咗出聲：「見你咁慘，個晾衫位讓畀你啦，反正我都就嚟搬。」
「搬去邊啊？」我問。
「想搬去電影城嗰邊，我讀戲劇㗎嘛，我想做個成功嘅演員，睇吓電影城嗰邊會唔會多啲機會。」
小花加多句：「最緊要係呢度啲租太貴啦，開始負擔唔嚟。」
我隨口問：「做演員？你演過咩角色？」
「對上嗰次就演屍體，一句對白都冇，唉，我都好想演啲有劇情嘅角色。」小花答。
夜晚瞓覺，喺老公嘅呼吸聲下，我諗起呢段對話，忽然有一個奇妙到極嘅諗法。
我再點樣折磨老公，都只可以鬧多佢幾句，總唔可以打佢斬佢，所以佢對我嘅恐懼都係有限嘅。
但假如我扮我殺咗小花，我係一個殺人犯，以老公嘅細膽，佢多數會同我離婚，離我有咁遠得咁遠。
當然，老公都有少少可能會舉報我，但我冇真係殺到小花，到時小花生勾勾咁出現，件事就變成老公誣衊我殺人，相信阿仔都冇藉口再反對我哋離婚。
我愈諗愈振奮，第二日就去搵小花商量。
「我扮死呃你老公？」小花目瞪口呆。
我點頭：「我老公唔知你就嚟搬，咁你可以做埋呢場戲先搬，喺我老公眼中，你就消失咗。放心，我會畀足演員費。」
小花諗一諗：「咁萬一，你老公喺條街度遇到我，佢咪知我冇死囉。」
「到時可能我哋已經離咗婚，如果真係咁唔好彩，我就認命啦，反正都冇損失。」我聳聳肩。
「殺人」計劃開始。
首先要做少少鋪墊，令老公相信我有殺小花嘅理由。
跟住落嚟，我日日都用各種理由，包括搶晾衫位、門口有污跡……五花八門嘅理由，同小花嘈交，嘈到幾乎打起上嚟。
然後，有一日老公返咗工，我同小花喺門口大吵一場，怒氣沖沖咁將小花帶入屋企，關門。
我嘅劇本係咁嘅，呢棟大廈嘅走廊有閉路電視，每層嘅住戶都可以喺電視翻睇閉路電視，冇特別事大家當然唔會睇。
但今日，我將小花帶番屋企，喺屋企佈置啲隱約嘅血跡、打鬥痕跡，再拖住一個大旅行喼出門。
老公夜晚返到屋企，發現奇怪嘅痕跡，佢睇番閉路電視，就會見到小花入咗屋之後，冇再出過嚟，只有我拖住喼出去。
咁件事就好明顯，我同小花嘈得厲害，入屋理論，我錯手殺咗小花，再將佢條屍運出去。
事實上，小花活生生咁匿喺雜物房嘅一角，會等老公第二日出門後，再離開呢間屋。
當然，萬一老公發現生勾勾嘅小花，件事就會穿晒。
我賭，老公份人咁懦弱，發現我殺咗人，佢應該驚到唔知點算，唔會到處搵嘢嘅。
我同小花入屋後，就開始佈置。
我想將準備好嘅豬血倒喺地下，小花就拎出幾塊用過嘅M巾：「人血同動物血嘅味唔同，萬一你老公伸條脷出嚟試吓，好易穿煲。」
小花將M巾嘅血擦喺地下同冰箱一角，再用抹布抹走，特登抹得唔太乾淨，留番小小痕跡。
我忍唔住讚佢：「果然係專業嘅演員。」
下集：https://bit.ly/3iHY10E
將專頁設定為「搶先看」/ "See first"，最新故仔馬上睇！
登山遇險，邊個係鬼？：https://goo.gl/8qseYB
我有一個守護神：http://bit.do/eUmMa
#短故 #短篇 #小說 #陳美濤 #廣東話 #粵語 #tomatochan #虛假謀殺案
Search